Një nga monumentet antike më të vizituara në botë, Akropoli i Athinës, ka nisur turne private për 5000 euro jashtë orarit zyrtar, sipas faqes për blerjen e biletave për turin e trashëgimisë greke.
Ato turne private të rezervuara për grupe deri në pesë persona, të cilat shkaktuan polemika kur u shpallën, fillojnë në orën 7:00 të mëngjesit ose pas orës 20:00, raporton AFP.
“Shërbimi ekskluziv është i disponueshëm vetëm për grupe prej katër deri në pesë persona dhe mund të përfshijë një guidë nëse klientët dëshirojnë”, thuhet në faqen e internetit të Hellenic Heritage, e cila prezanton turnetë me emrin “The Acropolis Experience”.
Sipas mediave greke, vizita e parë private u zhvillua të shtunën e kaluar pas mbylljes zyrtare, nga një çift rus i shoqëruar nga guida e tyre.
Vizitat private do të zhvillohen të martën, të premten dhe të shtunën dhe janë prezantuar për të shmangur turmat, sipas sajtit.
Kujdestarët e zonave arkeologjike, kundër vizitave private
Të paralajmëruar vitin e kaluar, turnetë private në Partenon dhe thesare të tjera të Akropolit ishin planifikuar fillimisht të nisnin më 1 prill, por u shtynë për një kohë të pacaktuar nga Ministria e Kulturës.
Sindikata e kujdestarëve të zonave arkeologjike greke kundërshton “mënyrën se si organizohen vizitat private pa pjesëmarrjen e tyre”.
“Nuk kishim informacion për organizimin e këtyre vizitave”, thonë nga sindikata.
Akropoli është ndërtuar në shekullin e 5-të para Krishtit, është një vend i Trashëgimisë Botërore të UNESCO-s dhe është një atraksion i madh për turistët. Vitin e kaluar është shënuar një numër rekord i vizitorëve – gati katër milionë sosh.
Zyrtarisht është i hapur për publikun nga ora 8:00 deri në 20:00, bileta e rregullt kushton 20 euro dhe në kombinim me objektet e tjera antike 30 euro.
