Rutina në botën e 2023-shit është kaq e ngarkuar sa bëhet gjithnjë e më e vështirë të heqësh dorë nga veset! Mendoni pak për numrin e shokëve/shoqeve që aktualisht po përpiqen të lënë duhanin. Pas maksimumi një jave, i shihni sërish me një paketë në duar teksa ju justifikohen se “stresi i përditshëm ua bën të pamundur” të fitojnë mbi këtë varësi.
E dimë që s’është gjëja më e thjeshtë në botë, por për duhanpirësit që po përpiqen, duket se trendi i ri po funksionon! Sigurisht që e kemi fjalën për vaping- cigarja elektronike që së fundmi ka fiksuar këdo njësoj sa Luizin brenda shtëpisë së Big Brother VIP!
Ky i fundit, pak kohë më parë deklaroi vetë gjatë një prime të Big Brother Albania se nga “dy paketa në ditë, pi vetëm 2 cigare” dhe për këtë ka ndihmuar vape-i i tij i preferuar. Gjithsesi, si çdo trend i ri, edhe vaping ka shkaktuar konfuzion për shkak të informacioneve të keqkuptuara që shpërndahen herë pas here online. Kjo jua vështirëson punën njerëzve të kuptojnë realisht (me zërin e Kiarës) nëse cigaret elektronike funksionojnë vërtetë apo jo!
Sipas studimeve të publikuara në National Health Service (NHS- Institucioni britanik i shëndetit publik) , nikotina që ka në përbërje një vape është shumë më pak e dëmshme sesa duhani dhe konsiderohet si një nga zgjedhjet më efektive për të gjithë ata që duan të lënë duhanin.
Edhe pse duhet thënë se vape-t mund të përmbajnë gjithashtu kimikate dhe toksina, sasia e gjetur tek to është thuajse e papërfillshme krahasuar me ato që gjenden tek cigarja. Në përbërjen e tij nuk gjenden elementët e dëmshëm të duhanit klasik si katrani apo monoksidi i karbonit. Duke qenë se ky produkt funksionon pa djegie, eleminon shumë substanca të dëmshme.
Një tjetër sekret pse vaping funksionon për shumicën e duhanpirësve është mënyra e dizenjimit të tij, që i ngjason shumë procesit të tymosjes! Një nga gjërat që i mungon më shumë duhanpirësve është veprimi i thithjes dhe nxjerrjes së tymit, prandaj ata ndihen po aq familjar kur në dorë kanë vape-n e preferuar!
Ndonëse vaping është alternativë e sigurt për të gjithë ata që duan të heqin dorë nga duhani klasik, gjatë fillimit të rutinës së re mund të përballeni me disa ndryshime që janë:
1-Kolla
Sigurisht që mushkëritë tuaja pasi të keni lënë duhanin do të jenë shumë të lumtura, por fillimisht përdorimi i vape-it do t’ju shkaktojë kollë. Kujtohuni të pini shumë ujë sepse të qënit të hidratuar do t’ju reduktojë kollën.
2- Pak dhimbje koke
Dhimbja e kokës mund të shkaktohet nga ndryshimi i nivelit të nikotinës. Ndonëse në vape të ndryshme ka nivele të ndryshme nikotine, trupi e absorbon disi më ndryshe krahasuar me cigaren klasike.
3- Ndryshime në nivelin e oksigjenit
Kur ju tymosni, niveli i qarkullimit të gjakut në trurin dhe trupin tuaj reduktohet. Vaping ju ndihmon të rregulloni këtë qarkullim dhe rrjedhimisht të keni sërish nivelet e përmirësuara të oksigjenit.
Nëse keni nisur të përdorni vape në vend të cigares, jeni duke reduktuar prezencën e monoksidit të karbonit në mushkëritë tuaja dhe po e riktheni oksigjenin në gjak në nivelet e normales. Pas 3-9 muajsh me një vape në vend të cigares mushkëritë tuaja do ta përmirësojnë funksionin me 10%. Vaping është si të thuash-e mesmja e artë kur vullneti i hekurt mungon!
