Ish-banorja e ‘Big Brother Vip Kosova’, Juliana Nura rrëfyer përjetimet e luftës në Kosovë, ku thotë se ka qenë 8 vjeç dhe shumë familjarë të saj janë masakruar.
Nura tregon në emisionin “S’e Luan Topi” se ajo jetonte në Finlandë në kohën e luftës, ndërsa babai i saj ishte kthyer në Kosovë dhe shpesh merrnin mesazhe të gabuara në lidhje me fatin e tij.
“Nuk e dinim nëse babi ishte gjallë”, tha ajo, ndërsa fëmijërinë e lidh me traumat e luftës, për të cilat thotë se bëhet më e madhe ndërsa vitet kalojnë.
“Unë isha vetëm tetë vjeçe kur lufta e Kosovës filloi dhe ajo na demoralizoi shumë si familje sepse unë rrjedh nga një qytezë si Drenica që njihet tashmë që ka ndryshuar historinë e Kosovës dhe troje të tjera. Familja ime ka dhënë shumë për këtë luftë. Babi im u kthye në Kosovë për të luftuar, ndërsa ne mbetëm në Finlandë. Në atë kohë rrija përpara televizorit për të parë çfarë po ndodh në Kosovë.
Kemi marrë shumë shpesh mesazhet e gabuara dhe demoralizoheshim shumë. Mamaja ime vjen nga Prekazi legjendar dhe kemi marrë lajme që u masakrua gjyshi, u masakruan pastaj familjarët e mamit dhe më pas familjarët e babait. Ndërkohë gjatë kësaj kohe babi im ishte në luftë dhe nuk e dinim a ishte gjallë apo jo.
Ankthi i një fëmije që priste për një telefonatë të hidhur, ajo është një traumë që me kalimin e viteve bëhet i madh. E ke si një ndjesi përbrenda që do të shpërthesh, por nuk mundesh. Kur mua më duhet të flas për fëmijërinë më kujton gjithmonë luftën e Kosovës, fatkeqësisht. Nuk është aspak e lehtë të flasësh për këtë gjë dhe kam vendosur të mos flas për këtë”, tha Juliana.
