Duhanpirja po rrezikon jetën e shumë personave. Çdokush që ka konsumuar 15 cigare në ditë për 15 vite rresht, ka një probabilitet të lartë për tu prekur nga kanceri i mushkërive.
Në këtë përfundim kanë arritur mjekët, të cilët e lidhin këtë lloj sëmundje me konsumimin e duhanit.
Nëse më parë njihej si sëmundje që prekte vetëm meshkujt, tashmë por prek shumë edhe femrat, pasi është rritur numri vajzave që pinë duhan e aq më tepër në moshë të re.
Instituti i Shëndetit Publik raporton për 800 raste të reja të prekur çdo vit nga kanceri i mushkërive në vendin tonë.
Regjistri kombëtar i pacientëve me kancer grumbullon të dhëna nga spitali Shefqet Ndroqi, Shërbimi Onkologjik dhe spitalet private, por ka shumë raste të cilët diagnostikohen dhe trajtohen në spitale jashtë vendit e nuk reflektohen.
Mjekët apelojnë për ndalimin e konsumimit të duhanit, ndonëse sipas tyre, numri i pacientëve që mbijetojnë nga kanceri i mushkrive është rritur.
Nga ana tjetër, Agjencinë Ndërkombëtare e Kërkimit për Kanceret, Globocan, të cilës i referohet edhe Organizata Botërore e Shëndetësisë raporton për afro 1100 raste të reja në vit dhe 960 humbje jete.
