Përveç yjeve të muzikës me origjinë shqiptare, tashmë një tjetër yll Hollywood-i ka ‘folur’ në gjuhën shqipe. Aktorja bukuroshe Angelina Jolie sapo ka publikuar librin e saj, ku ajo që vihet re është titulli në shqip.
“Njihni të drejtat tuaja dhe kërkojini ato” është titulli i librit, të cilin ajo e ndau me ndjekësit në Instagram.
Aktorja në mesazhin krahas fotove, ka vendosur të shkruajë në anglisht, shqip dhe 2 gjuhë të tjera. Jolie thekson se libri i saj është publikuar në Shqipëri, Kosovë, Poloni, Romani dhe Moldavi.
Teksa flet për rëndësinë e librit, Jolie në postimin e saj në Instagram u është drejtuar ndjekësve edhe në gjuhën shqipe.
“Për t’i kërkuar të drejtat tuaja, duhet t’i njihni ato. Neni 42 i Konventës për të Drejtat e Fëmijëve i detyron qeveritë të sigurohen që fëmijët dhe prindërit të jenë të vetëdijshëm për parimet dhe të drejtat e mbrojtura me konventë. Jam e lumtur që libri ynë për të drejtat e të rinjve tani është publikuar në Shqipëri, Kosovë, Poloni, Rumani dhe Moldavi, dhe ua dërgoj respektin tim të gjithë aktivistëve/eve që mbrojnë të drejtat e fëmijëve në rajon dhe që përdorin të drejtën e tyre të jenë të zëshëm”, ka shkruar aktorja.
Kjo është një tjetër vepër e përkryer e aktores, e cila është gjithashtu një grua humane me zemër të madhe e cila gjithmonë i ka bërtitur fortë kërkesat e saj për ndihmë ndaj njerëzve të varfër.
