Lufta në Gaza mes Hamasit dhe Izraelit ka lënë pas shumë viktima dhe të plagosur, në mesin e tyre gra, fëmijë etj. Ndërkohë kreu i Federatës Ndërkombëtare të Gazetarëve (IFJ), tha të hënën se një gazetar ose punonjës i medias vritet mesatarisht çdo ditë në luftën Izrael-Hamas.
Federata shton se rreth 60 përfaqësues të mediave janë vrarë që kur filloi lufta më 7 tetor, duke iu afruar numrit të gazetarëve të vrarë gjatë gjithë Luftës së Vietnamit gjysmë shekulli më parë që zgjati për dy dekada.
“Në një luftë tradicionale si për shembull ato në Siri, në Irak, në ish-Jugosllavi, nuk kemi parë këtë lloj masakre,” tha sekretari i përgjithshëm i Federatës Ndërkombëtare të Gazetarëve,
Anthony Bellanger në një intervistë për agjencinë Associated Press. Dhe që kur skadoi armëpushimi njëjavor në Gaza të premten, humbjet kanë vazhduar.
“Për fat të keq, morëm lajmin e keq këtë fundjavë që pas përfundimit të armëpushimit, janë vrarë tre ose katër (gazetarë) të tjerë” , tha Anthony.
Zoti Bellanger tha se rreth 60 gazetarë kanë humbur jetën, përfshirë të paktën 51 palestinezë, si edhe izraelitë dhe libanezë.
“Telefonova në qeverinë izraelite, por ata nuk m’u përgjigjën. Dhe kur shkova në Palestinë para disa ditësh, i kërkova zyrës së shtypit të qeverisë (izraelite) të bënim një takim. Por askush përgjigjet”, tha ai.
