Moderatorja Dojna Mema, ka ndarë së fundmi një rrëfim të ndjerë mbi humbjen e babait të saj, i cili u nda nga jeta pesë vite më parë nga një sëmundje e rëndë.
Dojna kujtoi periudhën e vështirë kur humbi babanë, duke rrëfyer se humbja e tij i ka dhënë një forcë të brendshme që e ndihmon të ngrihet pas çdo rrëzimi, si në jetë ashtu edhe në profesion.
“Më vjen një forcë e brendshme shumë e madhe që di të ringrihem, është shumëfishuar në momentin që babi im u largua nga kjo botë. Më duket se qëkur babi iku nga kjo botë dhe shkoi në tjetrën unë kam një person brenda meje që gjatë gjithë kohës më bën mua të ngrihem, sa herë që rrëzohem. Gjatë gjithë kohës më thotë: “Shiko, se kjo që ndodhi e ty të duket kaq e keqe ndodhi për një gjë më të mirë. Dhe kjo është ndoshta e vetmja gjë e bukur në gjithë këtë trishtim të madh, forca e mbinatyrshme që njerëzit nuk e kuptojnë nga u vjen. Unë e di që më vjen nga një engjëll.” tha Dojna.
Ajo rrëfeu në një intervistë për ‘Sol’ se e dinte që babai i saj nuk do të dëshironte ta shihte të trishtuar pas humbjes së tij, ndaj dhe u rikthye në ekran tri ditë pas ndarjes së tij nga jeta.
“E dija që babai im nuk do donte të më shihte të trishtuar pas humbjes së tij, ai do donte të shihte të bëja atë gjë që unë doja më shumë,” tha ajo.
Megjithëse kanë kaluar disa vite, moderatorja është shprehur se çdo ditë mbetet e vështirë për të.
“Është akoma shumë e vështirë humbja e tij pavarësisht se kanë kaluar 5 vite. Me kohën nuk bëhet më e thjeshtë. Je thjesht ti që mësohesh me faktin se nuk e ke më atë person, koha nuk e shëron mungesën e atij njeriu. Por, e ndjej të pranishëm kudo dhe më mban shumë të fortë. E gjithë forma e tij fizike është brenda meje, truri i tij është truri im, dora e tij është dora ime, është shumë e çuditshme për tu shpjeguar.” përfundoi moderatorja.
