Një nga imazhet më të qëndrueshme të markës së udhëtimeve verore të Greqisë është perëndimi i diellit i njohur në të gjithë botën, në ishullin e Santorinit, i dekoruar me kupolat e kishave blu, mbi shkëmbinjtë e thepisur mbi një kalderë vullkanike.
Kjo skenë ka frymëzuar miliona kartolina, postera dhe suvenire, dhe tani radha për të arritur deri në pikën më të mirë të shikimit, në fshatin majë shkëmbit Oia, mund të zgjasë më shumë se 20 minuta.
Santorini është një ndalesë kryesore për krocerat e mbushura me turistë në greqi. Por me disa pjesë të ishullit pranë ngopjes, zyrtarët po shqyrtojnë mundësinë e kufizimeve.
Nga një rekord 32.7 milionë njerëzish që vizituan Greqinë vitin e kaluar, rreth 3.4 milionë, ose një në 10, u ndalën në ishullin me vetëm 15.500 banorë.
“Ne duhet të vendosim kufij nëse nuk duam të mbytemi nga turizmi masiv”, tha për AFP kryebashkiaku i Santorinit, Nikos Zorzos. “Nuk duhet të ketë asnjë krevat të vetëm shtesë… qoftë në hotelet e mëdha apo në shtëpitë me qira të Airbnb.”
Ndërsa dielli perëndonte pas horizontit në Oia, mijëra njerëz ngrenë telefonat e tyre drejt qiellit për të fiksuar momentin magjik.
Për sipërmarrësit e zgjuar, perëndimi i famshëm, mund të jetë një burim parash. Por, nëpër rrugët e ngushta të Oias, banorët kanë vendosur tabela ku u bëjnë thirrje vizitorëve të respektojnë shtëpinë e tyre…
“RESPEKT… Është festa juaj… por është shtëpia jonë”, shkruhej në një tabelë.
I formuar nga një shpërthim vullkanik 3600 vjet më parë, peizazhi i Santorinit është “unik”, thotë kryebashkiaku, dhe “nuk duhet të dëmtohet nga infrastruktura e re”.
Rreth një e pesta e ishullit aktualisht është e zënë nga ndërtesa. Një mori pishnash dhe rezidencash luksoze tregojnë se santorini është gjithashtu edhe një destinacion i kushtueshëm. Në vitin 2023, 800 anije lundrimi sollën rreth 1.3 milionë pasagjerë në ishull.
Në qershor, kryeministri Kyriakos Mitsotakis foli për mundësinë e kufizimit të mbërritjes së anijeve turistike në ishujt më të njohur të Greqisë.
“Unë mendoj se do ta bëjmë vitin e ardhshëm,” i tha ai Bloomberg, duke vënë në dukje se Santorini dhe magneti tjetër turistik Mykonos “po vuajnë qartësisht”. Edhe ministrja e turizmit, Olga Kefalogianni, është në të njëjtën linjë dhe thotë për AFP se duhen vendosur kuota, pasi është e pamundur që një ishull si Santorini të presë pesë krocera me turistë në të njëjtën kohë.
